Takalo maso dahulunyo
Bamusim maso sa isuak
Lauik baru sacampak jalo
Gunuang baru salaweh mangkuak
Manuruik carito guru sajarah
Katiko dulu masih sikola
Sajak bumi balantai tanah
Sabalun ado manusia
Sajak siang baganti malam
Bulan baganti matohari
Sabalun diturunkan nabi adam
Kok disabuik isi nagari
Dunia hanyolah kabun binantang
Margasatwa kato rang kini
Sagalo nan pandai tabang
Tamasuak nan punyo kaki
Hiduik di ayie jo di darek
Didalam rimbo balantara
Tamasuak nan bakaki ampek
Sarato nan manjala jo malata
Disabuik kurenah ciek ciek
Dibaco parangai masiang masiang
Ado elok ado nan jahek
Ado pambangih jo pananiang
Maunyi babagai pulau
Di dalam rimbo siantah
Disiko carito kaba bagalau
Nan patuik dijadikan sajarah
Tasabuik namo pulau paco
Pulau andaleh disabuik urang
Sadang di hoyak gampo rayo
Bukik runtuah rimbo tapanggang
Takajuik isi nagari
Tangangak isi dunia
Datang bantuan siliah baganti
Tibo bantuan mancanegara
Datang gajah dari afrika
Panda tibo dari cino
Kangguru dari Australia
Arab sato mangirim unto
Mangirim sagalo buah buahan
Langkok jo ayie minumnyo
Baragam ragam nan nyo kirimkan
Sasuai kamampuan nan ado
Di dalam nagari baitu pulo
Baiak jawa jo Kalimantan
Raso badunsanak jo basudaro
Maraso ciek katurunan
Lah dibantuak tim komite
Mangumpuakan sagalo sumbangan
Walau jo rapek batele tele
Tapi lah dapek kaputusan
Lah takumpua sagalo buah
Dari nan ketek sampai nan gadang
Walaupun jo susah payah
Kasadonyo ikuik manyumbang
Manuruik carito nan di dapek
Katiko tajadi rapek karo
Banyak basilang pandapek
Lah tajadi batimbang kato
Maliek di ateh rupo
Basiang ateh nan tumbuah
Baa caro ma antakannyo
Lauik gadang pulaupun jauah
Babagai usul nan kalua
Manunjuakkan santiang sikua sikua
Harimau jo singo sato ma ota
Gajah pun sato pulo ma usua
Nan ka di bao buah buahan
Indak nan dagiang ciek juo
Buayo jo singo ma usulkan
Sarahkan sajo pado ahlinyo
Lah sapakat nan cadiak pandai
Lah saiyo nan tuo tuo
Siamang ,baruak karo jo simpai
Sagalo buruangpun ikuik sato
Babagai sumbang jo saran
Baruak gadang ma usul pulo
Manga ma angok kalua badan
Pagunokan sajo apo nan ado
Pado mancari nan sulik sulik
Dikabek padi jo daunnyo
Kito atua cimangko jadikan rakik
Jo pisang ameh pandayuangnyo
Mancaliak barek muatan
Indak mungkin sakali barangkek
Tantu badulu bakudian
Bialah lambek asa salamek
Bialah ambo barangkek dahulu
Nan lain dibulakang manyusua
Disinan kito batamu
Dibagi tugeh sikua sikua
Mandanga usul baruak gadang
Nan lain lah ma angguak pulo
Lah barangkek baruak jo pisang
Barakik melon jo cimangko
Nan lain baranang sikua sikua
Mamba apo nan bisa
Modal sumangek nan mambudua
Karano lillahitaala
Satibo rombongan disubarang
Dicaliak muatan isi rakik
Hampia saparo baban hilang
Cimangko jo melon lah tingga kulik
Pisanglah usak dari tandan
Buah lah banyak nan tingga tampuak
Ruponyo paga makan tanaman
Takicuah harimau dek baruak
Tarangah rombongan nan ikuik
Mandanga baruak bacarito
Pado kalaparan di tangah lauik
Elok di ansua apo nan ado.
Sudah cakak takana silek
Lah takicuah baru manyasa
Santiang mambaco nan tasurek
Nan tasirek indak di kana
Bapitaruah atah ka mancik
Kurang ingek binaso badan
Mancari basarik sarik
Lah dapek urang nan makan
Kini apo nan ka dibaco
Minyak abih samba ndak lamak
Jariah tabuang sio sio
Niat manoloang tacapai indak
Ikolah carito jo kucikak
Kaganti ota di palanta
Tapi santano kito simak
Tantu banyak takanduang pangaja.
Nan banamo lobo jo tamak
Sarato iri bacampua dangki
Sajak dunia balantak
Lah ado juo sampai kini.
Ikolah panyakik katurunan
Indak talok di dokter rumah sakik
Dima sajo ado kesempatan
Disinan setan manyalingkik
Lah lupo niat jo tujuan
Hilang pangana dek kurang iman
Tagoda jo makanan
Dek takuik kalaparan.
Tapi iko cari binantang
konon dijaman nabi suleman
Carito lamo pusako usang
Nan sampai kini masih tasimpan.
Tingga di awak nan manyimak
Ado carito nan patuik di tiru
Carito lawak bagalak galak
Sambia manunggu kopi susu.
